கிளம்ப வாருங்கள்

குறுக்கும் நெடுக்குமாகத்
தறிக்கத்தான் வெட்டுகிறான்
என மரமே அறியாவண்ணம்
வெட்டிக் கொண்டு வருகிறேன்

வட்ட வட்டமாக்கித்
தரிக்கத்தான் முறிக்கிறான்
என முட்செடிக்கே தெரியாவண்ணம்
முறித்துக்கொண்டு வருகிறேன்

கசையும் மகுடமும் நனைக்கும்
குருதி உடை துணித்து
என் முகம் படியெடுக்கிறீர்கள்

மலையேறியதும்
அரைக்கச்சையோடு மிஞ்சிய உடலை
சுமந்துவரும் பலகைக் கூட்டலில்
சாய்த்துக் கொள்வேன்

கால்கள் சேர்த்து ஒன்றும்
இடக்கையில் ஒன்றுமாக
நானே அறைந்துகொள்வேன்

வலதுகை ஆணியறைய மட்டும்
ஒருவர் வாருங்கள்

தலை சரிந்ததும்
கிளம்பிவிடலாம்.

14.06.2016