முறையீடுகள்

நன்றி: யாவரும்.காம்

1

ஆத்மாநாம் தன்னையே

கொன்று தேடினான்

கண்ணாடியில் கிடக்கிறான்.

2

என் வேகத்திற்கு என்றோ

கடலில் குதித்திருப்பேன்

அணைகட்டித் தடுக்கிறாய்.

3

குறுக்கிப் படுக்கிறேனாம்

நீட்டிதான் படுத்தேன்

உடம்பெல்லாம் அடிபடுகிறது.

4

அலையலையாய்த் துயர்

முறையிடுகிறது கடல்

அலைகண்டு மகிழ்கிறாய்.

5

எப்போதும் என்னைவிட

நீண்டிருக்கிறது நிழல்

வெளிச்சம் நேராக இல்லை.

6

தள்ளாடிய உலகத்தைக் காணவில்லை

கவிதையின் தோள்பற்றிச் சென்றதாம்

கடைசியாய்ப் பார்த்தவர் சொன்னார்.

7

இங்குதான் இருக்கிறேன்
எங்கும் போக முடியவில்லை
போகத் தெரியாமலில்லை.

8

எத்தனை முறை முயன்றாலும்
அடுத்தவர் கொல்ல முடியாது
ஆயுதமாயுதமாய்க் கண்டுபிடியுங்கள்.

9

எனக்கு உறைக்கவேயில்லை
ஏதோ தேவையிருக்கிறது
தோலமர்ந்து தேடுகிறது கொசு.

10

எனக்குக் கேட்கவேயில்லை 
ஒலித்தபடியே இருக்கின்றன
பாவம் பாடல்கள்.

- யுவபாரதி