பூதத்தின் கதை

கடற்கரைக்கா வந்துவிட்டோம்

குறுநடையின் வேகபாவனையில்

தூரம் தெரியவில்லை

உன் கையோங்கலுக்கு அஞ்சி

கடலுக்குள் ஓடுகிறது அலை

ஒளிய இடம் தராது கடல்விரட்ட

என் தோளேறிச் சிரிக்கிறாய்

தூரத்துக் கப்பல் பொம்மை வேண்டுமெனக்

கன்னம் தட்டுகிறாய்

பிஞ்சுக்கை காற்றில் வரையும்

ஓவியத்திலிருந்து குதிக்கும்

குட்டிதேவதைகளின் கதைகேட்க

தொடுவானமும் காது தீட்டுகிறது

ஒற்றைக் கண்ணும்

எண்ணிலி நகங்களும் கொண்ட

பூதத்தின் கதை மட்டும் ஏன்

சொல்ல வரவில்லை உனக்கு.

(இன்பாவுக்கு)