இவையும் காட்சிகள்

நன்றி: யாவரும்.காம்

1

கரிக்குருவி எதுவென்றாய்

காட்டுவதற்குள் பறந்துவிட்டது

வேப்பமரமெல்லாம் காகம்.

2

என்னை அடைத்த வீடு

வாசலில் சாவி தேடுகிறாய்

கடலில்தானே எறிந்தாய்

3

இருப்பவனை உயிரோடு

புதைத்து மறந்தீர்

இறந்தவர்களோடு எழுந்து வருகிறான்.

- யுவபாரதி

இரவுக் காட்சிகள்

நன்றி: யாவரும்.காம்

1

மின்கம்பிக் காகம்

இருளில் இடறியது

சிறகு எரிகிறது.

2

தனியறையில் இருளின் கால்கள்

முகம் புதைத்து அழுகிறான்

கண்பொய்த்த இரவலன்.

3

மனக்கால் மண்டபம்

இருளில் தொங்குகிறது

வௌவால்கள் துணையோடு.

- யுவபாரதி

தோரணவாயில்

நன்றி: யாவரும்.காம்

இரைச்சலும் இயல்பான நடிப்பும்

மிக்கதுன் உலகம்

மண்புரண்டு முனகும்

என் சொல்லுக்குக் குரல்வளமில்லை

மழுங்கிய அதன் விரல்களால்

அபிநயம் காட்டவும் முடியாது

அரங்கிற்கு ஏகும் மொழிரதம்

ஏதும் நசுக்கிவிரையும் முன்

மரத்தோரம் எத்திவிட்டுச் செல்

என் சொல்லை

காகம் அதன் கண் கொத்தட்டும்

எறும்பு அதன் உடல் தின்னட்டும்.

- யுவபாரதி