துரத்திவரட்டும் இருள்

இரவின் நீளத்தை அளந்து சொல்லென
யார் தூண்டியிருக்கக் கூடும்
தொடக்கப் புள்ளி தொட்டு
அதன் தோலில் விரல் தீற்றியபடி
ஓடிக் கொண்டிருக்கிறேன்

மேலும் மேலும் கருத்து
பாதை இருளச் செய்ய
யார் தூண்டியிருக்கக் கூடும்
தீற்றிய விரலால் துழாவியபடி
ஓடிக் கொண்டிருக்கிறேன்

பனியும் வியர்வையுமான பாதையில்
இரும்பு முட்கள் முளைவிக்க 
யார் தூண்டியிருக்கக் கூடும்
காலடிக் குருதி துப்பியபடி
ஓடிக் கொண்டிருக்கிறேன்

இன்னும் இன்னும் நீட்டிக்காட்ட
என் ஓட்டத்தோடே கூட நகர்ந்துவரவும்
அதை யார்தான் தூண்டியிருக் கூடும்
ஓடியவரை வாரிச் சுருட்டிக்கொண்டு
வெளிகுதித்தோடுகிறேன்
இருள் எனைத் துரத்திவரட்டும்
இனி.

08.01.2017

ஊமை ஓவியம்

இருளின் பாலை வெளிச்சத்தில்
நிலைகுத்தி விழிக்கிறது கண்

சுழித்தோடும் கால ஓலம்
ஒற்றைக்காதையும்
செவிடாக்கியிருக்கிறது

உறிஞ்சிய நீர்மை
என்றோ உலர்ந்திருக்க
ஒட்டியிருக்கிறது கன்னம்

சொல்லாளும் உலகில்
ஊமை ஓவியம்
ஆணியடிக்காத சுவரில்
ஆடிக் கொண்டிருக்கிறது.