சொல் சபிக்கப்பட்டது

எத்தனை முறை விரட்டியும்
முகம் பார்த்து நிற்கிறது
சொல்

கிழக்குக்கடல் உச்சியில் எறிந்தும்
மேற்குமலை ஆழத்தில் அமிழ்த்தியும்
எதிர்வந்து நிற்கிறது
சொல் சபிக்கப்பட்டது

சிலுவையில் மரித்தவன்
உள்ளங்கைத் துளையில்
ஒளித்து வைத்தும்
தூக்கிட்டுக் கொள்கிறவன்
குரல்வளையிலிருந்து
குதித்து நிற்கிறது
சொல் சாகடிக்கச் சபிக்கப்பட்டது.

11.06.2016