தேட்டம்

வெறிச்சோடிய தெருவில் நாய்
விடாமல் குரைத்துக் கொண்டிருக்கிறது
மண்ணள்ளி விசிறி
காலுதைத்துத் தேம்புகிறது குழந்தை
நகரமறுத்துக் கால்தேயவிட்ட ஆடு
தலைக்கயிறு பற்றி இழுபட்டுப்போகிறது
யாரும் கேட்காத மொழியை
சைகையோடு எழுதிக் காட்டுகிறான்
பித்தன்
காணாமல் போன என்னைத் தேடி
வெகுதூரம் வந்துவிட்டேன்.

18.01.2017

நிழல் வலி

வெளியே 

பயண நேரத்து நாய்க்குட்டி

முதுகும் நிமிராது

குரைக்கவும் கூடாது

உள்ளே 

உபரி நேரத்து ஓய்வறை

எங்கும் நகராது

எதிரொலிக்கவும் சுடாது

- யுவபாரதி

வீட்டுநாய்

நான்கு காலும் மூச்சிரைக்கும் நாக்குமாய்த்தான்

வீட்டு நாயும் இருக்கிறது

எங்கோ கூவும் சேவல் காணாது

அரைத்துயில் கெட்டுக் குரைக்கிறது

வெளிப்படும் எஜமானியின் கால் சுற்றி வால் குழைத்து

தலை தடவலில் கண்லயிக்கிறது

வீடும் வேலியும் தாழிடல் கண்டு

சங்கிலிக் கழுத்து இழுபட வேலி பிறாண்டுகிறது

தரை படுத்து வீதி வெறித்து

உணவு பரிமாறும் ஒற்றைத் தட்டோடு பகல் நகர்த்துகிறது

வாசலில் நிழல் நகரும்

எவ்வொரு கணமும் விசுவாசம் பொங்க வீறிடுகிறது

ஒற்றைத் தெருவில் இரவு மேய்த்து

இழுத்துக் கட்டும் நேரம்

கருவானம் நோக்கி ஊளையிடும் பாவனையில்

அசட்டுக் குரைப்போடு அடங்குகிறது

நான்கு காலும் மூச்சிரைக்கும் நாக்குமாய்த்தான்

வீட்டு நாயும் இருக்கிறது.

-யுவபாரதி

நகராட்சி வாகனங்கள் - பள்ளி வாகனங்கள் : ஓர் ஒப்பீடு

1) நகராட்சி வாகனங்களில் கதவுகள் பின்பக்கம் உள்ளன. பள்ளி வாகனங்களில் கதவுகள் பக்கவாட்டில் உள்ளன.

2) நகராட்சி வாகனங்களைக் கண்டதும் நாய்கள் ஓடிப் பதுங்குகின்றன. பள்ளி வாகனங்களைக் கண்டதும் பிள்ளைகள் ஓடிப் பதுங்குகின்றன.

3) நாய் பிடிப்பதற்காக நகராட்சி வாகனங்களை தெருவாசிகள் போராடி அழைத்து வரவேண்டியிருக்கிறது. பிள்ளை பிடிப்பதற்காக பள்ளி வாகனங்கள் அவையாகவே தெருத் தெருவாக வருகின்றன.

4) நகராட்சி வாகனங்களில் வரும் நகராட்சி ஊழியர்களே நாய்களைப் பிடிக்கவேண்டியிருக்கிறது. பள்ளி வாகனங்களைப் பொருத்தவரை பெற்றோரே பிள்ளைகளைப் பிடித்துக் கொடுத்துவிடுகின்றனர்.

5) நகராட்சி வாகனங்கள் கழுத்தில் பட்டி அணிந்த நாய்களைப் பிடித்துச் செல்வதில்லை. பள்ளி வாகனங்கள் கழுத்தில் பட்டி அணிந்த பிள்ளைகளையே பிடித்துச் செல்கின்றன.

6) நகராட்சி வாகனங்களில் ஏற்றப்பட்ட நாய்களில் மிரண்டு ஒடுங்கி அமைதி காக்கின்றன சில. ‘வள் வள்’ என்று கத்திக் கொண்டே இருக்கின்றன சில. பள்ளி வாகனங்களில் ஏற்றப்பட்ட பிள்ளைகளிலும் மிரண்டு ஒடுங்கி அமைதி காக்கின்றன சில. ‘வீல் வீல்’ என்று கதறிக் கொண்டே இருக்கின்றன சில.

7) நகராட்சி வாகனங்கள் நாய்களை அவை வாழும் பகுதியிலிருந்து ஒரே நாளில் அன்னியப்படுத்துகின்றன. பள்ளி வாகனங்கள் பிள்ளைகளை அவை வாழும் பகுதியிலிருந்து வருடக்கணக்கில் படிப்படியாக அன்னியப்படுத்துகின்றன.

- யுவபாரதி