இருப்பு

முள்வேலி தழுவி
மொக்குதிர்த்த கொடிமுல்லையும்
உடைந்த கால்தூக்கி
தத்திவரும் குட்டிப்பூனையும்
கவிதை தெரியாத என்னோடு
காத்திருக்கின்றன.

நேற்று இன்று

1

எல்லா நாளும்

ஒன்றுபோல்தான் இருக்கிறது

வேறு வேறு என்கிறோம்.

2

கால்கட்டிய கயிறு

எம்பி நடக்கிறது மாடு

ஒட்டிய வயிறு மூச்சிரைக்கிறது.

3

கதவுக்கும் திரைச்சீலைக்குமான இடுக்கு

குட்டிப்பூனைக்குப் போதும்

நான் எங்கே ஒளிவது.

- யுவபாரதி