சொல் சபிக்கப்பட்டது

எத்தனை முறை விரட்டியும்
முகம் பார்த்து நிற்கிறது
சொல்

கிழக்குக்கடல் உச்சியில் எறிந்தும்
மேற்குமலை ஆழத்தில் அமிழ்த்தியும்
எதிர்வந்து நிற்கிறது
சொல் சபிக்கப்பட்டது

சிலுவையில் மரித்தவன்
உள்ளங்கைத் துளையில்
ஒளித்து வைத்தும்
தூக்கிட்டுக் கொள்கிறவன்
குரல்வளையிலிருந்து
குதித்து நிற்கிறது
சொல் சாகடிக்கச் சபிக்கப்பட்டது.

11.06.2016

ஒக்கரைப்பட்டி

நுரைத்துப் பொங்கிய

மேகச் சுமையால் மெய்சிலிர்த்து

இன்னும் எத்தனை நாள்தான்

அசையாதுறங்கும் மேற்குமலை

மலையெழுப்ப விரையும்

காற்றைத்தான் குழப்பிவிடுகின்றனவா

வேதாந்தாவின் இராட்சத வெண்விசிறிகள்

காற்றசைத்த சோளந்தட்டையை

மென்றுவிழுங்கும் ஒட்டகமும்

மூன்று கல்நட்டுச் சமைத்தபடி

விசிறிபார்க்கும் சர்க்கஸ்காரர்களும்

யார்களிக்க மாலைக்குக் காத்திருக்கிறார்கள்

கடந்துவிரையும் பயணிகள்

இறைக்கும் காசுக்காக

காலுயர்த்திக் கனைக்கும் குதிரையோடு

காலகாலமாய்க் காவலிருக்கும்

கணவாய்ச் சாத்தனை

இழுத்துவந்து கேட்டால் தெரியுமா.