சொல்

சொல் நண்ப
சொல்
சொல்லாமல் போனாலும்
சொல்
அழிந்தா போகிறது.

23.01.2017

சொல் சபிக்கப்பட்டது

எத்தனை முறை விரட்டியும்
முகம் பார்த்து நிற்கிறது
சொல்

கிழக்குக்கடல் உச்சியில் எறிந்தும்
மேற்குமலை ஆழத்தில் அமிழ்த்தியும்
எதிர்வந்து நிற்கிறது
சொல் சபிக்கப்பட்டது

சிலுவையில் மரித்தவன்
உள்ளங்கைத் துளையில்
ஒளித்து வைத்தும்
தூக்கிட்டுக் கொள்கிறவன்
குரல்வளையிலிருந்து
குதித்து நிற்கிறது
சொல் சாகடிக்கச் சபிக்கப்பட்டது.

11.06.2016

சொல் நடை

குத்திக் குத்தி

இரத்தமெலாம் வற்றியதும்

சொல் பெருகியது

வெகுண்டு உதைத்ததில்

சுவரோரம் விழுந்தாலும்

சொல் மண்ணில்லை

கண்ணோடு கலங்கியது

காதோடு வலியேற்றது

கையோடு கெஞ்சியது

காலோடு

தவழ்ந்து போகிறது.

- யுவபாரதி